ओझे हे गाव नाशिक जिल्ह्यातील दिंडोरी तालुक्यात वसलेले एक छोटेसे पण वैशिष्ट्यपूर्ण गाव आहे. या गावात एकूण २४५ कुटुंबे वास्तव्यास असून गावाची एकूण लोकसंख्या सुमारे १३५४ आहे. गावातील लोकांचे मुख्य उपजीविकेचे साधन शेती असून येथे द्राक्षबागा मोठ्या प्रमाणावर दिसून येतात. याशिवाय गहू, ऊस, टोमॅटो, हरभरा, मका व सोयाबीन यासारखी विविध हंगामी पिके घेतली जातात. द्राक्ष उत्पादन हे गावासाठी विशेष महत्त्वाचे ठरते, कारण तेथील शेतकऱ्यांना आर्थिक उत्पन्नाचा मोठा भाग यावर अवलंबून असतो. शेतीव्यतिरिक्त अनेक कुटुंबे शेतमजूरी करतात, तर काहीजण लहान-मोठ्या व्यवसायातून आपला उदरनिर्वाह भागवतात.

शिक्षणाच्या दृष्टीने गावात जिल्हा परिषद प्राथमिक शाळा असून येथे १ ली ते ४ थी पर्यंतचे शिक्षण घेण्याची सोय आहे. प्राथमिक शिक्षणानंतरच्या माध्यमिक व उच्च माध्यमिक शिक्षणासाठी विद्यार्थ्यांना शेजारील करंजवण गावात किंवा तालुक्याच्या ठिकाणी म्हणजे दिंडोरी येथे जावे लागते. दिंडोरी गाव सुमारे १३ किलोमीटर अंतरावर आहे. विद्यार्थ्यांच्या सोयीसाठी आणि तालुक्याच्या ठिकाणी ये-जा करण्यासाठी महामंडळाच्या बससेवा नियमितपणे उपलब्ध आहेत, त्यामुळे शिक्षण व इतर कामकाजासाठी प्रवास सोपा झाला आहे.

धार्मिक व सांस्कृतिक दृष्टीने हे गाव समृद्ध आहे. गावात शनैश्वर जयंतीला मोठी यात्रा भरते, ज्यात गावकऱ्यांसह आसपासच्या भागातील भक्त सहभागी होतात. गावात महादेव मंदिर, मारुती मंदिर, लक्ष्मीमाता मंदिर, गोसावी बाबा समाधी मंदिर आणि शनि महाराज मंदिर अशी अनेक धार्मिक स्थळे आहेत. ही मंदिरे गावकऱ्यांसाठी श्रद्धेची केंद्रे आहेत. तसेच गावात दरवर्षी अखंड हरिनाम सप्ताहाचे आयोजन केले जाते, ज्यामध्ये गावकरी एकत्र येऊन भक्तीमय वातावरण निर्माण करतात.

सामाजिक व सांस्कृतिक एकात्मतेसोबतच शेतीप्रधान जीवनशैली हे माहितीओझे गावाचे मुख्य वैशिष्ट्य आहे. साधे, मेहनती व एकत्रितपणे राहणारे गावकरी आपली उपजीविका सांभाळून सांस्कृतिक परंपरा पुढे नेत आहेत. शेती, शिक्षण व धार्मिक एकात्मता यामुळे हे गाव नाशिक जिल्ह्यातील एक महत्त्वाचे व आदर्श गाव मानले जाते.